គ្រោះទឹកជំនន់នៅកូរ៉េខាងត្បូងផ្តាច់ជីវិតមនុស្ស​១៣នាក់ និងបាត់ខ្លួន​១៣នាក់

(សេអ៊ូល)៖  អាជ្ញាធរកូរ៉េខាងត្បូងបានឱ្យដឹងថា ភ្លៀងធ្លាក់ជោគជាំអស់រយៈពេល​ជាច្រើនថ្ងៃមកនេះ បានបង្កជាគ្រោះទឹកជំនន់ដ៏ធំសម្បើម ដោយបង្ខំឱ្យមនុស្ស ១...

(សេអ៊ូល)៖ អាជ្ញាធរកូរ៉េខាងត្បូងបានឱ្យដឹងថា ភ្លៀងធ្លាក់ជោគជាំអស់រយៈពេល​ជាច្រើនថ្ងៃមកនេះ បានបង្កជាគ្រោះទឹកជំនន់ដ៏ធំសម្បើម ដោយបង្ខំឱ្យមនុស្ស ១,០០០នាក់ ត្រូវជម្លៀសខ្លួនចេញពីផ្ទះសម្បែង ខណៈមនុស្សយ៉ាងហោច ១៣នាក់បានស្លាប់ និង ១៣នាក់ទៀតបាត់ខ្លួន។ នេះបើតាមការចេញផ្សាយ​ដោយសារព័ត៌មាន CNA នៅរសៀលថ្ងៃអង្គារ ទី០៤ ខែសីហា ឆ្នាំ២០២០។

មនុស្ស ១៣នាក់ខាងលើដែលបានបាត់បង់ជីវិត ត្រូវបានគេរាយការណ៍ថា ពួកគេស្លាប់នៅក្នុងគ្រោះរអិលបាក់ដី និងត្រូវទឹកគួចយកទៅឆ្ងាយ កំឡុងពេលជិះនៅក្នុងរថយន្ដ។ អាជ្ញាធរកូរ៉េខាងត្បូងបន្ថែមថា ទឹកជំនន់បានជន់លិចផ្ទៃដីស្រែចំការច្រើនជាង ៥,៧៥១ហិកតា រួមទាំងផ្លូវហាយវ៉េយ៍ និងស្ពានសំខាន់ៗ មួយចំនួយក្នុងរដ្ឋធានីសេអ៊ូលផងដែរ។

លោកប្រធានាធិបតីកូរ៉េខាងត្បូង មូន ចែអ៉ីន គ្រោងនឹងបើកកិច្ចប្រជុំបន្ទាន់មួយ​នៅថ្ងៃអង្គារនេះ បន្ទាប់ពីលោកបានជំរុញឱ្យអាជ្ញាធរថ្នាក់ជាតិ និងតំបន់បង្កើន​កិច្ចខិតខំប្រឹងប្រែងការពារ និងទប់ស្កាត់ធ្វើយ៉ាងឱ្យកុំឱ្យមានមនុស្សស្លាប់ ដោយសារគ្រោះទឹកជំនន់បន្តទៀត។

បន្ថែមពីលើនេះ ដោយផ្អែកលើប្រភពមិនបញ្ជាក់អត្តសញ្ញាណ ទីភ្នាក់ងារព័ត៌មានយ៉ុនហាប់ បានរាយការណ៍ថា កូរ៉េខាងជើងបានបើកទំនប់ទឹកមួយ​នៅជាប់តំបន់ព្រំដែនកាលពីថ្ងៃចន្ទ ដោយមិនបានជូនដំណឹងជាមុន ដល់អាជ្ញាធរកូរ៉េខាងត្បូងឡើយ ស្របពេលកូរ៉េខាងជើងក៏បានព្រមាន អំពីគ្រោះទឹកជំនន់ផងដែរ៕

ប្រភព៖ Freshnewsasia