សិក្ខាសាលាផ្សព្វផ្សាយ “ច្បាប់ស្តីពីការគ្រប់គ្រងប្រេងកាតនិងផលិតផលប្រេងកាត និងវគ្គបណ្តុះបណ្តាលស្តីពីហានិភ័យស្ថានីយ និងសារាចរសុវត្ថិភាពសម្រាប់ការរៀបចំស្ថានីយប្រេង និងឧស្ម័នឥន្ធនៈ”

(ខេត្តឧត្តរមានជ័យ) ឯកឧត្តម អុឹង អៀង រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្រ្តីក្រសួងរ៉ែនិងថាមពល បានអញ្ជើញជាអធិបត...

(ខេត្តឧត្តរមានជ័យ) ឯកឧត្តម អុឹង អៀង រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្រ្តីក្រសួងរ៉ែនិងថាមពល បានអញ្ជើញជាអធិបតីភាពបើកសិក្ខាសាលាផ្សព្វផ្សាយ “ច្បាប់ស្តីពីការគ្រប់គ្រងប្រេងកាតនិងផលិតផលប្រេងកាត និងវគ្គបណ្តុះបណ្តាល ស្តីពី ហានិភ័យស្ថានីយ និងសារាចរសុវត្ថិភាពសម្រាប់ការរៀបចំស្ថានីយប្រេង និងឧស្ម័នឥន្ធនៈ” ដោយមានការ អញ្ជើញចអញ្ជើញចូលរួមពីឯកឧត្តម ឌី រ៉ាដូ អភិបាលរងនៃគណៈអភិបាលខេត្តឧត្តរមានជ័យ មន្ទីររ៉ែនិងថាមពល និងមន្ទីរពាក់ព័ន្ធ នៅក្នុងខេត្តឧត្តរមានជ័យ។

សិក្ខាសាលានេះ មានគោលបំណងដូចខាងក្រោម៖

១-បង្កើនការយល់ដឹងអំពីច្បាប់ អំពីហានិភ័យដែលអាចកើតមានឡើង និងអំពីបែបបទ និងនីតិវិធីក៏ដូចជាបច្ចេកទេសសុវត្ថិភាពក្នុងការគ្រប់គ្រងនិងប្រកបអាជីវកម្មដល់ម្ចាស់ស្ថានីយ អ្នកសាងសង់ស្ថានីយ និងអ្នកធ្វើការស្តុកទុក ផលិតផលប្រេងកាត។

២-ពង្រឹងសមត្ថភាពមន្ត្រីជំនាញបច្ចេកទេស មន្ទីររ៉ែនិងថាមពល និងស្ថាប័នពាក់ព័ន្ធ ឱ្យយល់ពីតួនាទីភារកិច្ច និងនីតិវិធីនានាដើម្បីមានភាពងាយស្រួលក្នុងការបម្រើសេវាសាធារណៈជូនប្រជាពលរដ្ឋក៏ដូចជាការចុះត្រួតពិនិត្យនិងធ្វើអធិការកិច្ចប្រកបដោយប្រសិទ្ធភាព ប្រសិទ្ធផល និងតម្លាភាព ស្របតាមច្បាប់និងលិខិតបទដ្ឋានគតិយុត្តពាក់ព័ន្ធនានាជាធរមាន។

គួរបញ្ជាក់ផងដែរថា អនុលោមតាមច្បាប់ស្តីពីការគ្រប់គ្រងប្រេងកាត និងផលិតផលប្រេងកាត ខ្លឹមសារនៃមាត្រាសំខាន់ៗមួយចំនួនទាក់ទិននឹងស្ថានីយប្រេងនិងឧស្ម័នឥន្ធនៈរួមមាន៖

- មាត្រា៤១៖ ម្ចាស់ស្ថានីយប្រេងឬឧស្ម័នឥន្ធនៈ ត្រូវមានលិខិតអនុញ្ញាតអាចដំណើរការពីក្រសួងរ៉ែនិងថាមពល

- មាត្រា៤២៖ ម្ចាស់ស្ថានីយប្រេងឬឧស្ម័នឥន្ធនៈ ត្រូវមានវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួងរ៉ែនិងថាមពល មុននឹងចាប់ផ្តើមសាងសង់ហេដ្ឋារចនាសម្ព័ន្ធ

- មាត្រា៦៤៖ ម្ចាស់ស្ថានីយប្រេងឬឧស្ម័នឥន្ធនៈ ណាដែលគ្មានលិខិតអនុញ្ញាតអាចដំណើរការពីក្រសួងរ៉ែនិងថាមពល ត្រូវផាកពិន័យជាប្រាក់ពី ២០០ ពាន់រៀល ដល់ ១០លានរៀល

- មាត្រា៦៦៖ ម្ចាស់ស្ថានីយប្រេងឬឧស្ម័នឥន្ធនៈ ណាដែលគ្មានវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួងរ៉ែនិងថាមពល មុននឹងចាប់ផ្តើមសាងសង់ហេដ្ឋារចនាសម្ព័ន្ធគឺ៖ត្រូវផាកពិន័យជាប្រាក់ចំនួន ៤លានរៀល និងផ្អាកសកម្មភាពសាងសង់នានា ចំពោះហេដ្ឋារចនាសម្ព័ន្ធមានតម្លៃក្រោម៨០០លានរៀល។ និងត្រូវផាកពិន័យជាប្រាក់ចំនួន ១០លានរៀល និងផ្អាកសកម្មភាពសាងសង់នានា ចំពោះហេដ្ឋារចនាសម្ព័ន្ធមានតម្លៃចាប់ពី ៨០០លានរៀល។ ករណីនៅតែបន្តប្រព្រឹត្តអំពើល្មើសដដែល ត្រូវផាកពិន័យជាប្រាក់ចំនួនទ្វេដង។

- មាត្រា៦៧៖ បុគ្គលណាដែលធ្វើសកម្មភាពរារាំងឬបង្កឱ្យការាំងស្ទះដល់ដំណើរការអធិការកិច្ច ត្រូវដាក់ពន្ធនាគារពី១ខែដល់១ឆ្នាំ និងពិន័យជាប្រាក់ពី១លានរៀល ទៅ ៥០លានរៀល។ ហើយបើអ្នករាជការសាធារណៈឬពលរដ្ឋទទួលអាណត្តិសាធារណៈដោយការបោះឆ្នោតដែលធ្វើសកម្មភាពរារាំងឬបង្កឱ្យការាំងស្ទះដល់ដំណើរការអធិការកិច្ច ត្រូវដាក់ពន្ធនាគារពី ២ឆ្នាំដល់ ៥ឆ្នាំ និងពិន័យជាប្រាក់ពី១០០លានរៀល ទៅ ២៥០លានរៀល។