ប្រទេសប៉ាគីស្ថាន៖ មន្ទីរសុខាភិបាលខេត្តបាននិយាយថា មនុស្ស ៤នាក់រាប់បញ្ចូលទាំងមន្ត្រីប៉ូលិសម្នាក់ត្រូវបានសម្លាប់ និង២៦នាក់ផ្សេងទៀតរងរបួសក្នុង...
ប្រទេសប៉ាគីស្ថាន៖មន្ទីរសុខាភិបាលខេត្តបាននិយាយថា មនុស្ស ៤នាក់រាប់បញ្ចូលទាំងមន្ត្រីប៉ូលិសម្នាក់ត្រូវបានសម្លាប់ និង២៦នាក់ផ្សេងទៀតរងរបួសក្នុងហេតុការណ៍វាយប្រហារនៅទីក្រុង ឃ្វេថា ភាគនិរតីខេត្តប៉ាឡូជីស្ថាននៃប្រទេសប៉ាគីស្ថានកាលពីថ្ងៃពុធ។
លោក វ៉ាស៊ីម បេក អ្នកសម្របសម្រួលប្រព័ន្ធផ្សព្វផ្សាយរបស់ក្រសួងសុខាភិបាលប្រាប់អ្នកយកព័ត៌មានថា អ្នកស្លាប់ផ្សេងទៀតរួមមានកូន២នាក់ និងម្តាយរបស់ពួកគេ រួមទាំងអ្នករងរបួសផ្សេងទៀតត្រូវបានបញ្ជូនទៅកាន់មន្ទីពេទ្យស៊ីវិលឃ្វេថា។ លោកហ្គូឡាម អាហ្វា ម៉ាហេស្ហារ អគ្គស្នងការរងនៃប៉ូលិស ឃ្វេថា បាននិយាយថា អ្នកបំផ្ទុះគ្រាប់បែកអត្តឃាត បានបំផ្ទុះរ៉ឺម៉កដឹកគ្រឿងផ្ទុះរបស់គាត់នៅក្បែរឡានរបស់ប៉ូលិសក្នុងតំបន់បាឡេលីនៃទីក្រុងឃ្វេថា។
លោកបន្ថែមថា រថយន្តដែលបានផ្ទុះធ្លាក់ចូលក្នុងប្រឡាយក្បែរផ្លូវ។ ប៉ូលិសដែលរងការកំណត់គោលដៅកំពុងតែធ្វើដំណើរទៅបំពេញភារកិច្ចសន្តិសុខសម្រាប់ក្រុមការងារជំងឺស្វិតដៃជើងដែលបានដាក់ពង្រាយពាសពេញទីក្រុងដើម្បីចាក់វ៉ាក់សាំងដល់កុមារ។ មន្ត្រីបានបន្ថែមថា ការស៊ើបអង្កេតដំបូងបានរកឃើញថា គ្រឿងផ្ទុះប្រមាណជា ២៥គីឡូក្រាមត្រូវបានប្រើប្រាស់ក្នុងហេតុការណ៍បំផ្ទុះនោះ។
កម្លាំងប៉ូលិស និងសន្តិសុខ បានបិទតំបន់នោះ ហើយបើកប្រតិបត្តិការស្វែងរកនៅក្នុងតំបន់។ ប្រភពព័ត៌មានក្នុងតំបន់បានរាយការណ៍ឱ្យដឹងថា ក្រុមសកម្មប្រយុទ្ធហាមឃាត់ ថេរីក អូតាលីបង់ប៉ាគីស្ថាន បានអះអាងទទួលខុសត្រូវចំពោះការវាយប្រហារនោះ។
គួរបញ្ជាក់ផងដែរថា ការបំផ្ទុះនោះ ត្រូវបានធ្វើឡើងបន្ទាប់ពីក្រុមសកម្មប្រយុទ្ធបានប្រកាសបញ្ចប់កិច្ចព្រមព្រៀងឈប់បាញ់ជាមួយរដ្ឋាភិបាលប៉ាគីស្ថាន ដោយធ្វើការគំរាមវាយប្រហារនៅទូទាំងប្រទេស៕
ប្រភពព័ត៌មាន Xinhua ចុះផ្សាយថ្ងៃទី០១ ខែវិច្ឆិកា ឆ្នាំ២០២២
No comments